Samay Chakra ka safar ab apne charam par hai....Waqt aa gaya hai jab Khoon ko ladna hoga Khoon se, bachane k liye apna Vansh....Dhruv ko ladna hoga, jeetna hoga, tabhi to kehlayega Dhruv Mahaan, kyunki agar haar gaya Dhruv to shayad haar jayega uska Vansh bhi...

Destination 3.=> DHRUV MAHAAN

 

Yehan Dhruv ki Jet-Bike use guide karti hui uski manzil ki taraf leja rahi thi aur wahan Vitler pehle hi apni manzil par pahuch chuka tha......

aur vitler k welcome k liye khud wahan khada tha Mr. X.

Mr.X: Welcome vitler, aao aao, tumhara hi intezaar tha. tumhe yehan aa kar khushi to hui na? tum kuch bolte kyun nai? are main to bhul hi gaya, tumhari to jeebh bhi machanical hai, tabhi chalegi jab main chahunga. aao tumhe kuch dikhata hun.

Aur fir Mr. X vitler ko apne remote control se control karte hue apne system chamber me le gaya.

Mr. X: ye dekho Vitler, yehin se mera virus attack shuru hota hai. ye poora karega mere sapne ko.

Vitler sab kuch dekhte hue bhi kuch nahi kar sakta tha. Uske sharir ka ek ek ang Mr. X ka ghulam tha.

Mr. X: Chalo ab tumhe tumhare baaki saathiyon se milata hun.

aur Mr. X fir vitler ko apne sath ek room me le kar gaya...

Mr.X: ye dekho vitler, ye hai mera detention floor. yehan par wo log bhi hain jinhe tumne mere peeche bheja tha, par bechare mere security systems ko tod nahi paye. chinta mat karo, ye sab thik hain. ab chalo main tumhe tumhara kamra dikhata hun.

Mr. X, vitler ko ek andhere kamre me le jata hai.

Mr.X: filhaal tum yehan aaram karo, tumhare liye mere pas 1 surprise ready hai aur dusra surprise is building ki terrace par ready ho raha hai. kal subah sare surprise ek sath dunga. dekha mujhe tumhara kitna khyaal hai?? Tumhare liye 2-2 surprise ready kiye hain. abhi main chalta hun. kal subah milenge.

Par Mr. X nahi jaanta tha ki kal ki subah to aani hi nahi thi. uske pehle kisi aur ko ana tha. ek aise taare ko jo jurm ki kaali rat me chamak kar use subah k ujaale me badal deta hai. Mr. X terrace par jata hai. wahan bahut light chamak rahi thi aur koi Reactor chal raha tha jisme kuch reaction chal raha tha.

Mr.X: chalo, reactor ka kaam to achchi se chal raha hai. aj ki rat bahut important hai. kyunki kal poori duniya meri ghulam hogi. mujhe koi galti nahi karni hai. ab mujhe watch-room chalna chahiye. wahin se poori building par watch rakhunga.

Fir wo wapas neeche utar kar ek room me jata hai. wahan ek badi si screen lagi thi jis par sare building k CC Cameras se images display ho rahi thi. Mr. X aaram se wahan baith gaya,aur sochne laga, "waise to kisi ki itni himmat nahi hogi ki meri building me ghusne ki koshish kare, par fir bhi mujhe satark rehna chahiye. filhaal to koi gadbad nahi dikh rahi hai."

Aur fir Mr. X ko neend lag jati hai.

 

Day 4

 

Subah ka ujala hone me abhi Thodi der thi, lekin Dhruv us building k neeche pehle hi pahuch chuka tha.

Dhruv: he bhagwan, itni unchi aur badi building....aur iski terrace par itni tez light kyu flash ho rahi hai. wahan koi ho sakta hai. maine socha to tha ki chat k raaste se enter karunga par ab lagta hai ki saamne k raste se hi jana chahiye. par itni badi building me to main us computer ko dhundhta hi reh jaunga. khair, chalo koshish to ki jaye.

Dhruv jaise hi andar ghusta hai, Mr. X ki screen par msg flash hone lagta hai-'SECURITY BREACHED'

aur Mr. X ki neend achanak se khul jati hai.

Mr. X: Itni himmat kiski ho gayi jo mere ghar me ghusne ki koshish kare?

aur Mr. X apni cc camera screens par nazar daudata hai aur uski aankhen failti chali jati hain....

Mr.X: he bhagwan, ye main kya dekh raha hun? saakshaat Super Commando Dhruv, is yug me. jarur vitler ne unhe bulaya hoga time machine ki madad se mujhse ladne k liye aur ye vitler ka peecha kar k yehan tak aa gaye. khair dekhta hun ye mere security system ko kaise tod pate hain.

Aur fir ek chuhe billi ka khel shuru ho gaya. bas ye kehna mushkil tha ki chuha kaun aur billi kaun. dhruv ek ek karke Mr. X k sare security traps ko todta chala gaya.

Mr. X: oh no, ye to 14th floor par pahuch chuke hain. 15th floor par mera mother terminal hai aur main is waqt 28th floor par hun. mujhe unse pehle apne ultra computer tak pahuchna hoga,warna wo kahin uske sath koi ched-chad na kar den.

idhar dhruv Mr. X ki ummeedon par pani ferte hue 15th floor par pahuch chuka tha. aur uske saamne tha.....

Dhruv: Ultra Computer. yehi hoga. ye waisa hi dikh raha hai jaisa vitler k system chamber me tha. ab mujhe koi aisa slot dhundhna hai jahan main is formatting drive ko fit kar sakun. haan ye raha. chalo formatting drive to andar gayi, ab Jessica ko signal bhejna hai. jessica ne thik guess kiya tha. yehan TRANSMISSION JAMMER lage hue hain. Mera Star Transmitter kaam nahi kar raha. waise isi samay k liye jessica ne mujhe ye DATA FLARE diya tha. Jessica ne kaha tha ki jaise hi main drive insert kar dun, ye DATA FLARE on kar dun. aur uski team apna kaam shuru kar degi.

aur dhruv ne data flare on kar diya.

Dhruv: maine data flare on to kar diya par mujhe to kuch dikha nai. pata nahi jessica ko signal mila ya nahi. isse to hamare zamane k Signal Flare hi achche the. waise jessica ne kaha tha ki mujhe ye data flare se nikalne wala Data Blast dikhai nahi dega par uska terminal ise detect kar lega. i hope, ki kar liya ho. Pata nahi is yug ne kaisa mazak bana rakha hai. jabse yehan aya hun, network, data, codes, aur computer jaise shabd sun sunkar paagal ho gaya hun. kya yehan koi cheeze simple nai hai? waise ek tarah se dekha jaye to achcha hi hai. kyunki lagbhag 6,000kms k distance se unhe mera signal flare to nahi dikhta tha, par jessica ne kaha tha ki ye data flare duniya k kisi bhi kone se uske system par detect ho jayega.

fir dhruv ultra computer par nazar daudata hai.

Dhruv: hmmm, screen par kuch badlaav to nazar aa rahe hain. shayad jessica ko signal mil gaya, aur uski team ne apna kaam shuru kar diya hai. chalo,ab to jab tak jessica ka kaam khatm nahi ho jata, yehin time pass karna hai. waise mujhe ek baat badi ajeeb lagi. wo ye ki jis ultra computer ki security ki liye har floor par itne jabardast security arrangements the, uski personel security k liye is room me kisi ko nahi rakha gaya hai?

"kyunki iski security main khud karta hun."

Dhruv peeche palat k dekhta hai. uske saamne ek smart aur strong naujawan khada hai.

Dhruv: to tum ho Mr. X?

Mr. X: Mr. X?? to ye naam diya hai aapke logon ne mujhe? achcha hai. waise mera apna ek naam hai aur mujhe wo pasand hai.

Dhruv: lekin, tum to mujhe akele dikh rahe ho. jessica ne to kaha tha ki itne bade level par kaam koi akela nai kar sakta.

Mr.X: jessica ne thik kaha tha. ye kaam ek akela insan nai kar sakta agar wo akela insan main nahi hun to. jahan tak mera sawal hai, main 100 k barabar hun.

Dhruv: great, confidance to bahut hai tum me. par tumhare kuch kaam nai ayega. saaf saaf batao yehan kya chal raha hai. tumhari terrace par kya chal raha hai?

Mr. X: yehan kya chal raha hai, ye to aap bhi jaante hain, warna aap yehan aate hi nai. aur upar mere data reactor me ek Data Bomb taiyar ho raha hai. kal subah tak wo taiyar ho jayega aur fir main usme load karunga apna Next Level Virus.

Dhruv: next level virus?

Mr.X: haan, maine apne virus ko next level tak pahucha diya hai. jo saans se hote hue ek aam insan k sharir me bhi pahuch jayega aur uske brain ko infect kar dega. duniya ko isse koi fark nahi padega, duniya jaise chalti rahi hai, waise hi chalti rahegi, par meri marzi k khilaf kuch nai hoga. is data bomb ka dhamaka na dikhayi dega na sunayi dega, par wo itna bada dhamaka hoga ki poori dharti par meri Data Dust fail jayegi,jo loaded hogi mere next level virus se, wo virus jo is waqt aapke peeche mere ultra computer me taiyyar ho raha hai.

Dhruv: Vitler aur baaki mech-manav kahan hain?

Mr.X: sab surakshit hain. main kisi ki jaan nahi leta. jaan lekar mujhe kya milega? agar sab mar gaye to main control kise karunga? mujhe to bas is duniya ko chalana hai.....apni sharton pe. maine apke saare sawaalon k jawab de diye. ab aap mere sawaalon k jawab dijiye. aap yehan kya karne aye hain?

Dhruv: tumhara computer kaafi ganda ho gaya tha. main dhulayi ki tikiya le k aya tha aur is waqt jessica aur uski team tumhare computer ki dhulayi kar rahe hain.

Mr. X computer par najar daudata hai. wo ek pal me sara maajra samajh jata hai aur formatting drive ko bahar nikaalne k liye aage badhta hai par dhruv lapak kar uske samne aa jata hai.

Dhruv: tum ye drive tab tak nahi nikaal sakte jab tak formatting complete nahi ho jati.

Mr. X: aadarniya, main aapse vinti karta hun, plz mere raste se hat jaiye.

Dhruv: Aadarniya? oh my god, itna sabhya villian maine apni poori crime fighting carreer me aaj tak nahi dekha.

Mr.X: sabhyata ka ye paath maine aapse hi sikha hai aadarniya. main apka fan jo hun.sach kahun to maine sab kuch aapse hi sikha hai.

Dhruv: jhooth. agar tum mere fan hote to ek apradhi nahi hote.

Mr.X: ye sach hai. main shayad is duniya me aapka sab se bada fan hun. aur kya apne haq k liye ladna apradh hota hai? main usi cheeze ko haasil karne k liye lad raha hun jo duniya ne hamse cheen li thi.

Dhruv: apni ye bakwass bandh karo. tumhare jaise bahut se apradhi maine dekhe hain jo apne apradh ko justify karne k liye apne upar hue atyachar ki duhayi dete hain aur duniya ko doshi thehrate hain. par ek bat hamesha yad rakhna, duniya me aisa kuch bhi nahi hai jo kisi apradh ko justify kar sake. aur kisi ki azadi chin lena to meri nazar me sabse bada apradh hai, jaan lene se bhi bada. isliye apni ye bakwaas computer games band karo aur chup-chap surrender kar do. main waada karta hun, agar kaanoni tarike se apna haq mangoge to main khud tumhe tumhara haq dilaunga. isliye behtar yehi hoga ki tum mujhse haath milalo nahi to mujhe tumhe kanoon k hawale karna hoga aur yehan ka kanoon kitna sakht hai ye to main bhi nahi jaanta.

Mr. X: aapse hath milane ka sapna to main jarur pura karunga, lekin ek bat yad rakhiye aadarniya, haq maangne se nahi milta, use cheen kar haasil karna padta hai.

Dhruv: agar aisi bat hai to mera tumse vaada raha,agar pyar se apna haq mangoge to main tumhe khud tumhara haq dilaunga aur agar galat tarike se haasil karna chahoge to mujhe apne raste me khada paoge.

Mr. X: aadarniya, aap samajhte kyu nai? aap kuch nai kar sakte. mujhe meri ladayi ladne dijiye. ye aapki ladayi nahi hai.ye aapka yug nahi hai. yehan aapka koi kaam nai hai.

Dhruv: yug chahe koi bhi ho, ye dharti meri hai. aur is dharti par jahan bhi apradh hoga, wahan mera kaam hoga.

Mr. X: aadarniya, main aapse vinti karta hun, yehan se chale jaiye.

Dhruv: main tumhe ek behtar option deta hun. tum yehan se peeche hat jao.

Mr. X: main peeche nai hat sakta.

Dhruv: lemme guess,apne lakshya se peeche kabhi naa hatna, ye bhi tumne mujhse hi seekha hai? after all tum mere itne bade fan jo ho.

Mr. X: theek samjha aapne.

Dhruv: to tumne ye kaise soch liya ki main peeche hat jaunga?

Mr. X: aap meri baat kyu nai samajh rahe?

Dhruv: tum meri ek bat samjho. tum apna samay kharab kar rahe ho. jitna waqt baaton me waste karoge, jessica ki team ko tumhare computer ko fomat maarne k liye utna jyada time milega. isliye baaton me samay mat kharab karo. ya to surrender karo ya lado. jitni jaldi mujhe haraoge, agar hara paye to, utni jaldi apne computer ko wapas apne control me le paoge. main bhi baithe baithe bore ho gaya hun. meri bhi kuch exercise ho jayegi.

Mr. X: aadarniya, aap mujhe majbur kar rahe hain ki main aap par hath uthaun.

Dhruv: aur tum mujhe majbur kar rahe ho ki main tumhare uthte hue hath ko rokne k liye tum par hath uthaun.

Mr. X: thik hai aadarniya, aage jo hoga uske liye main jimmedar nahi hounga.

Dhruv: tum ho bhi nahi sakte. kyunki aage jo hoga wo mere hisab se hoga.

Mr.X: thik hai aadarniya, aapne mere aage aur koi raasta nai choda hai. par chinta mat kijiye. main apko maarunga nahi. sirf apko kaabu me karunga taaki main apne computer ko fir se apne control me kar sakun aur fir main apko aapke yug me wapas bhej dunga.

Dhruv: shart lagaoge? haar jaoge. mujhe kaabu me karna mujhe maarne se jyada mushkil hai.

Mr. X: ye to waqt hi batayega.

Dhruv: to fir waqt ko baaton me zaaya kyun kar rahe ho? tum mujhe apna idol maante ho na? to meri ek baat hamesha yad rakhna. jo waqt ko nahi bachate, waqt unhe nahi bachata.

Mr. X: to fir sambhaliye aadarniya.

Mr.X apni laser gun nikaalta hai aur sochta hai, "agar yehan ladayi hui to mere computer ko nuksan ho sakta hai. inhe yehan se bahar le jana hoga.

Dhruv sochta hai, "agar jessica ka kaam pura hone se pehle iski laser gun se is computer ko damage pahuch gaya to shayad ye virus hamesha k liye mech-manavon me reh jayega. mujhe iski laser ko dodge karte hue chat tak jana chahiye. wahin se us data bomb ko khatm karne ka bhi koi tarika milega."

Mr. X dhruv par laser chalata gaya aur dhruv use dodge karta hua kamre se bahar nikal gaya. dono ki soch alag alag thi par maksad ek hi tha, isliye bina koi pareshani k dono terrace par aa gaye.data reactor ab bhi chalu tha. Mr. X aur dhruv dono hi ek dusre se kam nahi lag rahe the. aisa lag raha tha jaise dono me koi fark hi nahi. antar tha to sirf laser gun ka aur wo antar bhi dhruv ne jaldi khatm kar diya Mr. X k hath se gun gira k. dono ki fighting style bhi ek jaisi thi aur icchchashakti bhi. aisa lag raha tha jaise dhruv apni hi mirror image se lad raha tha.

wahan jessica ki team apna kaam kar rahi thi aur yehan dhruv Mr. X ko rok kar unhe kaam pura karne ka samay de raha tha. dono ko ladte hue kaafi der ho gayi ki achanak dhruv ko sar me tez dard hone laga. Dhruv apne upar kaabu pate hue sochta hai, "pata nai achanak itna sardard kyu ho raha hai. mujhe is waqt sirf is data bomb ko nasht karne ki taraf dhyan dena hoga."

Dhruv: ek baat batao, agar ye data bomb abhi fat gaya to kya hoga.

Mr. X: kuch nai hoga, abhi isme virus loaded hi nai hai.

Dhruv: tab to ise abhi fat jana chahiye.

Mr.X: ye reactor itne heavy metal ka bana hai ki ise meri laser gun bhi nasht nahi kar sakti. aur itna bhari hai ki aap ise hila bhi nai sakte. aap ise nasht kar hi nai sakte.

Dhruv: shart lagaoge? haar jaoge.

Dhruv apni belt me se kuch nikalta hai.

Dhruv: batao ye kya hai?

Mr.X: ye to signal flare hai. aapke zamane me milta hoga. ab to shayad kisi museum me hi dikhega. aap kya isse mere data reactor ko jalaoge? hahaha, wo koi baarood ka dher nahi hai jo apke flare ki aag se fat jayega.

Dhruv: tum apne aap ko mera fan kehte ho par fir bhi mujhe samjhe nahi. dekho main kya karta hun.

Dhruv ne signal flare ko apne aur Mr. X k beech me hi fod diya. Dhruv ne to sahi waqt par aankhen band kar li thi par Mr.X aisa nai kar paya aur uski aankhen chaundhiya gayi aur kuch der k liye wo kuch dekh nahi paya. In kuch der me dhruv ne apni poori ichchashakti se us bhaari reactor ko thoda sa tilt kiya aur uske neeche apna Roller Skate rakh diya aur fir reactor ko dusri taraf se tilt karke dusra roller skate bhi uske neeche rakh diya aur unhe Auto Mode par chalu kar diya. Jab tak Mr. X dekhne layak ho paya tab tak uska bhaari data reactor dhruv k roller skates ki sawari karta hua chhat ki edge ki taraf badh raha tha. wo use bachane ki koshish me uski taraf dauda. par wo nahi dekh paya ki jitni der uski aankhen band thi, utni der me dhruv ne chhat k ek sire se dusre sire tak star line baandh di thi. idhar Mr. X dhruv ki star line me atak kar gira aur udhar reactor chat ki railing todta hua neeche ki taraf chal pada. Mr. X utha aur daud kar chat ki edge par pahucha aur usne dekha ki reactor zameen se takra kar chur chur ho gaya tha aur sath me khatm ho gaya tha data bomb bhi.

Dhruv: dekha Mrrrrrrr. tum jo bhi ho, metal chahe kitna bhi bhaari ho, 40 manzila building ki chat se girne par to uska yehi haal hona tha.

Mr. X: ye aapne achcha nahi kiya. ab aap dekhiye main aapke vitler ka bhi yehi haal karunga.

Mr.X apne remote par kuch button dabata hai aur Vitler thodi me chat par aa jata hai, aur chalte hue chat ki edge par ja kar khada ho jata hai Mr. X k baju me.

Mr. X: dekhiye aadarniya, aapka chaheta vitler, uska dimag ab bhi uske kabje me hai par uska sharir mere kabje me hai. agar aap yehan se wapas nai gaye to isi waqt mere ishare par vitler yehan se neeche kood jayega aur iska kya haal hoga ye aap bhi jante hain. Jessica ko aap kya jawab denge?

Dhruv: nai nai, aisa mat karo, main chala jaunga.

Tabhi achanak dhruv ki naak se khoon nikalne lagta hai. dhruv sochta hai, "are ye kya ho raha hai mujhe? pehle tez sardard, aur fir ab naak se khoon! nahi mujhe is waqt sirf vitler ko bachane me concentrate karna hai."

Tabhi Dhruv ki nazar Mr. X ki laser gun par padi. wo furti se uchla. Mr.X k kuch samajh pane se pehle hi laser gun dhruv k hath me thi aur nishana saccha aur khatarnaak tha. Dhruv ki gun se nikli laser Mr. X k daahine panje k sath remote bhi le udi. Mr. X dard se karah utha.

Udhar Vitler Mansion me-

Team Lead- mam, "Formatting complete."

Jessica: good, isi waqt Mr. X k system ko override karo aur sabse pehle vitler ki formatting karke uski nayi encoding karke use power supply karo. ek bar wo thik ho gaye to saari sthiti sambhal lenge. pata nahi aadarniya dhruv thik hain bhi ya nahi.

Team lead- ok mam, bas 2 min. me Vitler Mahan fir se apne sharir ka control haasil kar chuke honge.

Udhar Mr. X dard se chatpata raha tha ki uske building k speaker system par announcement hone lagi, SYSTEM OVERRIDING INITIATED aur achanak Vitler behosh ho k gir gaya.

Mr. X: ye....ye kya hua?

Dhruv: lagta hai jessica ne tumhare system ko format kar diya aur use control me lekar vitler k sharir ko bhi format maar diya hai. tumhara khel khatm Mr. X. Mujhe jo karna pada uska mujhe dukh hai, main tumhe koi shaaririk nuksan nahi pahuchana chahta tha par main majbur tha. aakhir mujhe apne vansh ki raksha karni thi.

Mr. X: apne vansh ko bachane k liye.....? apko laga main sach me vitler ko chat se gira dunga? main sirf apko darane k liye naatak kar raha tha par aapne to mera hath hi.....

Mr. X ki aankhon me aansu the jo dard k nahi the, Dhruv ne Mr. X ki aankhon me aanken daal kar dekha. Use saaf samajh aa raha tha ki kuch aisa hai jo use maalum nahi hai.

Dhruv: tum.....tum aakhir kaun ho? tumhara naam kya hai?

Udhar Vitler Mansion me-

Team lead- mam, vitler mahan ki encoding badal kar unhe power supply kar di gayi hai. sirf kuch seconds me wo fir apne pairon par honge.

Jessica: great.ab wahan ka kaam wo sambhaal lenge. tum baaki mech-maanavon ko bhi thik karo aur fir is duniya k har computer system se us biopic virus ka naam-nishan mita do.

Udhar dhruv k dimag me kuch chal raha tha, pata nahi kyu use kuch ajeeb sa lag raha tha.

Mr. X: dhanyawad aadarniya, aapne apna kaam pura kiya. aj ek bar fir hame keemat chukani padi aapke.......

Lekin is se pehle ki Mr. X ki baat puri ho pati, Vitler ko hosh aa gaya. wo ek jhatke se utha aur Mr. X ko zor se push kar diya. Mr.X ab bhi chat ki edge par khada tha. Wo zameen se takrane k liye badh chala.

In 2 seconds k dauran Dhruv k dimag me Bhagwan Shri Krishna k sath hui saari baaten flash ho gayi.

"Itihaas se seekh lekar Bhavishya ko badlo"

"Aaj se 3 din baad Arjun Karna ka vadh karne wala hai. Agar tum kuch kar sakte to kya karte Dhruv?"

"Main dono ke beech ki galatfehmi ko door karta aur Karna ko wapas Dharma k raste par laata."

"waqt aane par samajh jaoge."

Dhruv zor se chillaya, "Nahi Vitler ruk jao." par tab tak der ho chuki thi. Bina ek bhi pal waste kiye dhruv ne bhi 40 floor upar se neeche chalang laga di. Vitler dekhta hi reh gaya. Dhruv aur Mr. X me abhi bhi kaafi doori thi. ek death defying sunt me pehle dhruv ne star line fek kar Mr. X ko bandh diya aur fir hawa me hi kalabazi kha kar palta aur starline k dusre sire ko chat ki taraf fek diya. star line chat par atak gayi aur Mr. X hawa me hi ruk gaya. ab dhruv ki baari thi lekin, "uff,sari star-line khatm ho gayi. lagta hai meri maut bhavishya kaal me hi likhi thi." Par tabhi jaise hi dhruv Mr. X k parallel me pahucha, hawa me latke hue Mr. X ne apna left hand stretch kar k dhruv ko ek jhatke se pakad liya.

Mr. X: chinta mat kijiye aadarniya, main apko kuch nahi hone dunga. agar aap ko kuch ho gaya to hamara kya hoga. is duniya ka kya hoga?

Vitler ye sab aankhen faad kar dekh raha tha. ab aur koi chaara nahi tha. usne dono ko upar kheech liya. upar ate hi dhruv ne Mr.X se pucha, "batao, kaun ho tum? batao mujhe kyun tum meri itni izzat karte ho? kyu tumne mujhe maarne ki nahi balki sirf kaabu me karne ki koshish ki? kyu tum vitler ko nahi maarte? meri wajah se kaise tumhe fir se keemat chukani padi? kyun?" par Mr. X ne dusri taraf muh kar liya. Dhruv uski taraf gaya aur uski collar pakad kar bola, "jawab do mujhe. meri aankhon me dekho aur batao tumhara asli naam kya hai? kaun ho tum?"

Mr. X: jaanana chate hain aap? to suniye, mera naam hai AARYAN, aur main aapka......... VANSHAJ hun.

Dhruv: yeh...yeh tum kya keh rahe ho?

Vitler: ye jhuth hai, main apne pita ki eklauti santaan hun.

Aaryan: Main bhi apne pita ki eklauti santaan hun, par tum ye bhul gaye ki inke 2 bete the.

Vitler: kya? matlab......tum RISHI k.......?????

Aaryan: kyu, vishwas nahi hota? aaiye aap dono mere sath.

Aaryan, Dhruv aur Vitler ko ek projector room me le jata hai jahan ek k bad ek photos flash hone lagti hai.

Aaryan: pehchante ho in sab ko? nahi na? par inhe to pehchante honge?

Vitler: ye to...ye to Dhruv Mahaan k bete Rishi hain. to kya tum Rishi Mahaan k......?

Aaryan: han, main Rishi ka vanshaj hun, jaise tum inke bete JALAJ k vanshaj ho.

Dhruv: ye kya ho raha koi mujhe batayega? Vitler jawab do.

Aaryan: ye kya jawab denge? jawab main deta hun. mujhe dusri bar apka vanshaj hone ki kimat chukani padi kyunki main aapke NAAJAYAZ Aulad Rishi ka Vanshaj hun. Aapke aur aapki dost RICHA k bete ka vanshaj.

Dhruv: ye sab bakwas hai. main kabhi NATASHA ko dhokha nahi de sakta.

Vitler: aapne koi dhokha nahi diya tha aadarniya.

Aur fir Vitler Dhruv ko poori kahani sunata hai ki kaise Natasha se apni shadi k bad Dhruv ne bimaar Richa ko zindagi me jeene ka ek maksad dene k liye use Artificial Insemination se Rishi k roop me ek beta diya tha aur kaise Robo dwara Natasha ka bachcha badal dene k bad usne Richa ka beta Natasha ki god me de diya tha aur fir kaise Natasha ko Jalaj wapas mila.

Vitler: aur fir aadarniya, apke aur Aadarniyaa Richa k chale jaane k baad Aadarniyaa Natasha ne hi apke dono beton ko bada kiya lekin unke gujar jane k kuch hi mahino me Aadarniya Rishi ghar chod kar bhag gaye, Jalaj Mahaan ne unhe dhundhne ki bahut koshish ki par wo unhe nahi mile. Uske bad to unka aur unke Vansh ka aaj tak koi naamo-nishan nahi hai. koi nahi jaanta tha ki wo kahan hain.

Dhruv: lekin.....lekin agar sach me aisa hua tha to bhi Rishi ghar se kyu bhag gaya?

Aaryan: Iska jawab inke paas nahi hai kyunki ye utna hi jaante hain jitna inhone kitabon me padha hai. is sikke ka dusra pehlu main jaanta hun.

Dhruv: to batao mujhe...batao aisi kya wajah thi ki Rishi ko aisa kadam uthana pada.?

Aaryan: wajah the aap. kyunki wo aapki bina shadi ki ek najayaz santaan thi. Natasha maa ka pyar Rishi aur Jalaj k liye barabar hi tha. lekin kahin na kahin fark tha.. apni kokh k bachche ko haasil karne ki khushi aur wo bhi 5 saal baad... Rishi ko bachpan se ye fark mehsus hone laga tha, par asli fark to tab pada jab Natasha maa k guzar jane k bad Jalaj aur Rishi ko duniya ka saamna karna pada. ye duniya ye samaj jise aap itna chahte hain, jiske liye aapne apna pura jeevan samarpit kar diya aur jiske liye aapne maut ko bhi gale laga liya, ise insani bhavnaon ki koi kadra nahi hai. Are inhone to Bhagwan Raam, Devi Sita aur unke beton Luv-Kush ko bhi nai bakhsha tha. Is samaj ne Mahavir, Daanvir Karna ko bhi nahi choda to apke bete Rishi ki kya aukaat thi? Jahan Jalaj ko is samaaj ne apni sar aankhon par bitha liya, wahin rishi ko sab tirchi nazron se dekhne lage. unki nazar me wo aapka beta nahi balki apne chahete Dhruv ki ek charity thi... ek marti hui besahara ladki k upar kiya hua upkaar. ye sab wo jyada dino tak seh nahi sake aur 25 saal ki umra me wo ghar chod kar bhag gaye aur unhone ek nayi duniya basa li, aapki duniya se kahin door. aapke aadarsh,aapke vichaar aapki ek ek bat hamare vansh me pidhi dar pidhi aage badhte rahe. bas ek cheeze jo hamare vansh ne aage nahi badhayi wo thi aapki apradh vinashak ki parampara. Rishi aur unka poora vansh, Mahaan Dhruv ka vansh hone k bawjood gumnami ki zindagi jeeta raha aur gumnami ki maut mar gaya. puchiye is samaj se jisse aapko itna pyar hai ki agara apke do bete the to har yug me ek hi Dhruv kyu tha. Kahan gaya Dusra Dhruv?? aaj is samaj k paas 2-2 Dhruv hote agar unhone Rishi k sath aisa vyavhar nahi kiya hota.. par maine thaan liya tha ki is samaj ko sabak sikhaunga.. nahi marna mujhe gumnami bhari maut.... is samaj ko bataunga ki in logon ne ye soch kar ki inke liye ek hi Dhruv kaafi hai, bahut badi galti ki. Bataunga inhe ki ek Dhruv ko thukrane ka kya anjaam.....

Dhruv: BAS.... bas karo... he bhagwan, kya ye din dikhane k liye aapne mujhe is yug me bheja tha...isse to achcha hota ki aap meri jaan le lete. jis samaj k liye maine apna jeevan samarpit kar diya, us samaj k liye mere hi khoon me itni nafrat? mera hi khoon us samaj ka dushman ban gaya. isse to achcha hota ki main be-aulaad hi mar jata.

Jis Dhruv ko dono Dhruv Mahaan k naam se jaante the, aur uske kisse sun-sun kar bade hue the, use yun muh Chhipa kar rote hue dekh Vitler aur Aaryan andar tak hil gaye. Dhruv ka 1-1 shabd Aaryan k dil me khanjar ghonp raha tha. Use ab pachtawa ho raha tha.

Vitler: aadarniya, hamse kuch bhul ho gayi hai to hame kshama kar dijiye. main jaanta hun ki aapke vanshajon ne apka bahut dil dukhaya hai, par aap to mahaan hain aur mahaanta to maaf kar dene me hoti hai, pichli bar aapne mujhe 1 mauka diya tha. aj Aaryan ko ek mauka de dijiye. uski aankhon me dekhiye. uski aankhon me pachtawa aur sharm saaf jhalak rahi hai.

Aaryan: haan aadarniya, main apni galti par sharminda hun. dekhiye aapne mujhse vaada kiya tha ki agar maine pyar se apna haq maanga to aap khud mujhe mera haq dilayenge. aaj main aapse aapka naam maangta hun. Mujhe mera haq dilwa dijiye.

Dhruv ne Aaryan ko apne seene se laga liya.

Dhruv: thik hai Aaryan, maine tumhe maaf kiya. Vitler tum yehan jitne bhi mech-maanav bandi hai sabko chudwao, main Aaryan ko lekar hospital jata hun, uske hath se kaafi khoon beh chuka hai. Mujhe maaf kar do Aaryan. maine tumhara hath.....

Aaryan: koi bat nahi aadarniya, maine aapke khoon ko ganda kar diya tha. aapne apne hathon se use baha diya. meri saza aur prayashchit, dono ho gaye. hath ka kya hai, uski jagah mech-panja lag jayega.

Dhruv: nahi Aaryan, tumhara prayashchit abhi nahi hua hai. wo tab pura hoga jab tum vaada karoge ki apni baaki puri zindagi is samaj k naam kar doge.

Aaryan: main vaada karta hun aadarniya.

Vitler: chaliye ab baaki baaten ghar par bhi ho sakti hain. abhi dusre zaruri kaam hain.


Day 5

 

Aur Agli subah tak sab kuch normal ho chuka tha. Aaryan ka operation bhi ho chuka tha. Vitler Mansion me hansi khushi ka maahoul tha.

Jessica: sab kuch normal ho gaya hai to kitna accha lag raha hai na?? Achcha hua Aaryan tum aa gaye. warna tumhare bhaiyya Vitler kai bar mujhse kehte the ki unhe kitna dukh hota hai ki wo Dhruv Vansh k aakhiri vanshaj honge. ab tum to jaante hi ho, ki unka Dimag chod kar sab kuch....ahem...metal ka hai. Ab tum aa gaye ho to Dhruv vansh ko aage badha sakte ho.

Dhruv aur Aaryan zor-zor se hasne lage. Itne me Vitler aata hai.

Vitler: Aadarniya, chaliye mere sath. Jessica, Aaryan tum bhi chalo.

Aur sab Vitler Mansion se bahar nikalte hain. Dhruv dekhta hai ki gate par "VITLER MANSION" ki jagah "DHRUV MANSION" likha hua hai.

Dhruv: ye kya hai?

Vitler: aaj se ye mera nahi, aapke vanshajon ka ghar hai. Aaryan aaj se mere sath rahega. is duniya ko chalane me mera hath batayega.

Dhruv: nahi Vitler, tumhe duniya ko chalana nahi hai, balki duniya ko sahi dhang se chalne me madad karni hai. aur ye kaam dono ko mil kar karna hai.

Vitler: ji aadarniya, ab aap sab mere sath aayiye.

Thodi der me Vitler sabko usi square par le kar gaya jahan dhruv ne aate waqt apna life-size statue dekha tha. lekin ab us statue ki jagah wahan koi huge structure khada tha jo ek bahut bade kapde se dhaka hua tha.

Vitler: aadarniya, ye jagah aapko yad hai?

Dhruv: pehle to nahi thi par tumhari wo memory rejuvanator pehenne k bad yaad aa gaya. ye to wahi MAYSEKAR SQUARE hai jahan......

Vitler: jahan aapne hame pehli bar DOOVE Mahaan k naam se darshan diye the. hamne is square ka naam badal kar Doove Square rakh diya aur aapki yad me yehan aapka ek statue khada kar diya tha.

Dhruv: lekin ab mujhe yehan kyun le kar aye ho?

Vitler: aapke samman k liye.

Dhruv: nahi vitler, ye sab mujhe pasand nahi hai. main koi bada kaam nahi karta. sirf apna farz nibhata hun.

Vitler: aur ab hame apna farz nibhane dijiye. aadarniya, aj yehan jo kuch bhi ho raha hai, wo puri duniya k har chote bade stadium me live projector se project kiya ja raha hai aur saari duniya aapko dekh rahi hai, plz unhe nirash mat kijiye. iska udghatan kijiye. ye button dabate hi ye virtual cloth cover hat jayega.

Dhruv button dabata hai aur kapda gaayab ho jata hai aur uski jagah khada tha Dhruv lekin itna bada ki bade bade sky-scrapers bhi uske saamne chote lagen.

Dhruv: Vitler, ye kya hai?

Vitler: aadarniya, ye ek solid ray projection hai jo "Dhruv Mansion" ki chhath par lage projector se sidha yehan project ho raha hai. ye hai to apki ek projected image, par ye Solid-ray ki bani hai. ise log chu sakte hain. ye is duniya ki sabse unchi sky-scraper building se bhi jyada unchi hai. aadarniya, aj tak humne aapki mahaanta k kisse-kahaniyan suni thi, par aj puri duniya ne aapki mahaanta dekhi hai. aapki ye image hame yad dilati rahegi ki hum sab aapki mahaanta k samne kitne chote hain. aap ek Yug Purush hi nai, balki ek mahaan VANSH RAKSHAK bhi hain. aapne 2 bar apne vansh ki raksha ki aur use sahi raah dikhayi. aap nahi hote to shayad aaj vansh k hathon vansh hi maraa jaata. aaj ye puri duniya DHRUV MAHAAN ko salaam karti hai.

Dhruv k pas kehne ko kuch nahi tha. Tabhi achanak-

Aaryan: aadarniya, aapki naak se fir khoon nikal raha hai.

Dhruv apne chehre pe hath laga kar dekhta hai to uske hath me khun aa jata hai. Achanak Dhruv ko chakkar aane lagte hain aur wo behosh ho k gir jata hai.

 

 

Samay ka Chakka ek akhiri bar ghumne ko taiyyar hai. Kya Samay Chakra k is Antim Padaav tak Dhruv sahi-salamat pahuch payega???? Ya ruk jayega pehle hi uski zindagi ka safar?? Agar Dhruv pahuch gaya is Antim Padaav par to use deni hogi ek AGNI PARIKSHA....Dusri Baar.